पौडेल र प्रहरीको मुठभेड ‘कलाबिहीन’ नाटक !’

काठमाडौँ– संसदको राज्यव्यवस्था समितिको सोमबारको बैठकमा सत्तापक्षकै सांसदहरुले गृहमन्त्री र प्रहरी प्रशासनको शैलीमाथि प्रश्न उठाएका छन् । गत असार ५ गते सर्लाहीमा विप्लव नेतृत्वको नेकपाका जिल्ला नेता कुमार पौडेलको मृत्युमा प्रहरीले मुठभेड भनेपनि सांसदहरुले त्यसलाई कलाबिहिन नाटक भनेका छन् । कतिपय सांसदहरुले यो घटनापछि सरकारले नै पुन द्वन्द्व सिर्जना गर्न खोजेको आरोप समेत लगाएका छन् ।

सोमबार समितिले गृहमन्त्री रामबहादुर थापा र प्रहरी महानिरीक्षक सर्वेन्द्र खनालाई बैठकमा डाकेर छलफल गरेको थियो । छलफलमा गृहमन्त्री थापाले प्रहरीसँगको मुठभेडमा पौडेलको मृत्यु भएको दावी पेश गरेपनि सांसदरु प्रश्नमाथि प्रश्न गर्दै सरकारको भनाईमा विस्वाश गर्न तयार देखएिनन् ।

नेकपाका सांसद झपट रावलले प्रहरीले पौडेल मुठभेडमा मारिएको भनेर कलाबिहिन नाटक गरेको आरोप लगाए । उनले भने,‘नाटक गरेपछि कमसे कम ढङ्ग पुर्याएर त गर्नुपर्छ । यो त ढङ्ग नपुर्याएर गरेको कलाबिहिन नाटक हो । घटनाको प्रकृतिले मान्छे मर्यो भन्दा पनि काल पल्क्यो भन्ने देखायो ।’

उनले घटनाको तथ्य जे आएको छ, प्रहरीले दिएको विवरणसँग त्यसको कुनै साइनो नभएको भन्दै तत्काल घटनाकोे छानविन गर्नुपर्ने माग गरे । उनले विप्लव समुहप्रति सरकारको बुझाई के हो ? भन्दै प्रश्न गर्दै वार्ताको माध्यमबाट समस्याको हल खोज्न आग्रह पनि गरे ।

यस्तै नेकपाका अर्का सांसद एवम् पूर्व गृहमन्त्री जनार्दन शर्माले विगतमा झै प्रहरीले मुठभेडको नाम दिएको बताए । उनले पौडेलको हात ६÷७ ठाँउमा कसरी भाँचियो भन्ने प्रश्न गर्दै प्रहरीले न्यूनतम् मानवअधिकारको पनि पालना नगरेको बताए ।

प्रतिक्रिया दिनुहोस