राहत माग्दा वडा अध्यक्षले स्थानिय माथि थप्पड हानेकाे अाराेप

दार्चुला, २१ बैशाख।

कोरोना भाइरसको प्रकोपका बेला विभिन्न तहका सरकारका जनप्रतिनिधीहरुले आफ्ना जनताहरुलाई राहत वितरण गरिरहेका छन् तर दुहु गाउँपालिकामा भने जनताले राहत माग्दा जनप्रतिनिधीले थप्पड हानेका छन् ।

दुहु गाउँपालिकाको वडा नं ५ मा स्थानियले राहत माग्दा वडाध्यक्षले थप्पड हानेका हुन् ।

वडा कार्यालयमा राहत वितरण भइरहेको खबर पाएपछि राहत माग्न वडा कार्यालयमा पुगेका स्थानिय मदन महरालाई वडाध्यक्ष दौलत सिह महराले थप्पड हानेको पिडित महराले बताएका छन् ।

वडाकार्यालयले आइतबार दिउसो राहत बाडिरहेका बेला आफुले पनि राहत माग्न जादा वडाध्यक्ष महराले थप्पड हानेको पिडित मदन महराको भनाई छ ।

वडाध्यक्ष दौलत महराले भने थप्पड हानेको नभई धक्का मात्रै दिएको बताएका छन् ।

“राहत वितरण भएका बेला आफुहरुले नपाए वडा कार्यालयमा तालाबन्दि गर्ने भन्दै १५÷२० जना युवाहरुको समुह आएको र सम्झाउदाँ नमाने पछि धक्का मात्रै दिएको हु, हातपात गरेको छैन” वडाध्यक्ष महराले भने ।

वडाध्यक्षले हातपात नगरेको दाबि गरिरहदाँ प्रत्यक्षदर्शी र पिडित भने राहत माग्दा वडाध्यक्षले थप्पड हानेको बताउँछन् ।

वडा समितिले पहिलो चरणमा गाउँपालिकाबाट प्राप्त रकमको राहत खरिद गरि ९९ सय परिवारलाई वितरण गरेको र उक्त राहत मदन महराले पनि पाएको वडाध्यक्ष दौलत सिह महराको भनार्ई छ ।

दोस्रो चरणमा प्राप्त रकम वाट वडा समितिले राहत सामग्री खरिद गरि ४८ परिवारलाई वितरण गरेको वडाध्यक्ष महराको भनाई छ ।

उक्त ४८ परिवार मध्ये ३० परिवारले पहिलो चरणमा वितरण भएको राहत पनि पाएका थिए ।यसरी दोस्रो चरणमा वितरण हुने राहतका लागी नयाँ छनौट हुने १८ परिवार मात्रै छन् ।

दोस्रो चरणमा राहत पाउने ४८ परिवार भित्र आफु पनि छनोट भएकोमा आफ्नो नाम काटेर अरुलाई वितरण गरिएको र आफुले राहत माग्दा वडाध्यक्षले थप्पड हानेको स्थानिय मदन महराको भनाई छ ।

“लकडाउनले रोजगारी नपाउँदा समस्यामा परेको छु, घरमा १४ जनाको परिवार छ, चामल किन्न लाई पनि पैसा छैन, जनप्रतिनिधिलाई सहयोग माग्दा थप्पड पाए” उहाँले गुनासो गरे ।

आफु निकटका र खान लाउन पुग्नेलाई पनि राहत बाडिरहदा वास्तविक गरिव घरपरिवारलाई वडाकार्यालयले राहत नदिएको स्थानियहरुको गुनासो छ ।

विपन्न परिवारका मदन महरालाई राहत माग्दा थप्पड हान्ने वडाध्यक्षले हुनेखाने बर्गलाई राहत वितरण गरिरहेको स्थानिय धन सिह महराको आरोप छ ।

विवाद बढेपछि वडाध्यक्ष दौतल सिह महराले स्थानिय मदन सिह महरा संग माफी मागी घटना साम्य पारेको स्रोतले जनाएको छ ।

प्रदेशको बाट प्राप्त भएको रकम दोस्रो चरणमा वितरण भइरहेको र ६ लाख ९० हजारले सबै परिवारलाई समेट्न सम्भव नभएको दुहु गाउँपालिका अध्यक्ष पुलेन्द्र बहादुर कार्कीको भनाई छ । स्थानियहरुले दामासाहि तरिकाले वितरण गर्न माग गरि वडाध्यक्षको विरोध गर्न नियोजित ढंगले घटना गर्न खोजीएको अध्यक्ष कार्कीको भनाई छ ।

प्रतिक्रिया दिनुहोस